പാവറട്ടി
ഗ്രാമ പഞ്ചായത്ത്

സാമൂഹ്യ-സാംസ്കാരിക ചരിത്രം

പാവറട്ടി എന്ന സ്ഥലനാമത്തിനു പിന്നില്‍ നിരവധി കഥകളാണ് പഴമക്കാര്‍ ചൂണ്ടിക്കാണിക്കുന്നത്. വസ്ത്രങ്ങള്‍ നെയ്യാന്‍ ഇവിടെയുണ്ടായിരുന്ന നെയ്ത്തുകാര്‍ പതിവുള്ളതിന്റെ ഇരട്ടി പാവ് ഉപയോഗിച്ചുവന്നിരുന്നതിനാല്‍ ഈ സ്ഥലത്തിന് പാവിരട്ടിയുള്ള സ്ഥലമെന്നു വിളിപ്പേര്‍ വന്നുവെന്നും അത് കാലാന്തരത്തില്‍ പാവറട്ടിയെന്നായി ലോപിച്ചുവെന്നുമാണ് പ്രധാന സ്ഥലനാമകഥ. ഒരു സ്ത്രീ പാവയുടെ രൂപത്തിലുള്ള റൊട്ടിയുണ്ടാക്കി വിറ്റിരുന്നതിനാലാണ് ഈ സ്ഥലം പാവറട്ടിയായതെന്നും, പാവപ്പെട്ടവര്‍ താമസിച്ചിരുന്ന സ്ഥലമായതിനാല്‍ പൊവര്‍ട്ടി എന്നതിനോട് സാമ്യമുള്ള പാവറട്ടി എന്ന പേരു നല്‍കപ്പെട്ടു എന്നുമൊക്കെ നിരവധി കഥകള്‍ പ്രചാരത്തിലുണ്ട്. പഴയ ബ്രീട്ടിഷ് മലബാറിന്റെ ഭാഗമായിരുന്ന ഇവിടെ, ചാവക്കാടു നിന്ന് ഏനമാവു വരെ നീളുന്ന പാത കടന്നുപോയിരുന്ന പാവറട്ടി സെന്ററിനു സമീപത്തായി അക്കാലത്ത് ഒരു കാവല്‍പുര പ്രവര്‍ത്തിച്ചിരുന്നു. അതുകൊണ്ട് പാവറട്ടി സെന്ററിനെ മുന്‍കാലത്ത് കാപ്പുര(കാവല്‍പുര) എന്നും വിളിച്ചിരുന്നു. അന്നത്തെ കാപ്പുരയും അതിനുസമീപത്തെ പ്രദേശങ്ങളും വളര്‍ന്നുവികസിച്ചതാണ് ഇന്നത്തെ പാവറട്ടി സെന്റര്‍. കരമാര്‍ഗ്ഗത്തിന്റെ കാര്യത്തില്‍ പാവറട്ടിയില്‍ ആദ്യമുണ്ടായിരുന്ന മേല്‍പ്പറഞ്ഞ പാത ചെമ്മണ്‍പാതയായിരുന്നു. വെള്ളവും ചെളിയും നിറഞ്ഞ ആഴമേറിയ തോടുകളും പന്തലിച്ച കുറ്റിക്കാടുകളും പാവറട്ടിയുടെ പ്രധാന പ്രത്യേകതകളായിരുന്നു. മുന്‍കാലങ്ങളില്‍ ഭൂരിഭാഗമാളുകളും കൃഷിയെ മാത്രം ആശ്രയിച്ച് കഴിയുന്നവരായിരുന്നു. കൊച്ചിയില്‍ നിന്നും പൊന്നാനി വരെയുള്ള ജലപാതയുടെ കൈവഴിയായ പെരിങ്ങാട്ട് കടവ്, പാവറട്ടിയുടെ ബാഹ്യലോകത്തേക്കുള്ള ജലഗതാഗതകവാടമായിരുന്നു. കൊച്ചിയില്‍ നിന്നും പാവറട്ടിയിലേക്കുള്ള ചരക്കുകള്‍ വന്നിറങ്ങിയിരുന്നത് ആ കവാടത്തിലൂടെയായിരുന്നു. വിദ്യാഭ്യാസത്തിന് ഒരു ജനതയുടെ സംസ്ക്കാരികജീവിതത്തില്‍ എത്രമാത്രം സ്വാധീനം ചെലുത്താന്‍ കഴിയുമെന്നുള്ളതിന് പ്രത്യക്ഷോദാഹരണമാണ് ഈ പഞ്ചായത്ത്. ഇരുപതാം നൂറ്റാണ്ടിന്റെ ആദ്യദശകത്തില്‍ തന്ന ആരംഭിച്ച സെന്റ് ജോസഫ്സ് ഹൈസ്കൂളും സംസ്കൃതവിദ്യാപീഠവും മുപ്പതുകളില്‍ ആരംഭിച്ച ക്രൈസ്റ് കിങ്ങ് സെന്റ് ജോസഫ്സ് സ്ക്കുളും പഞ്ചായത്തിന്റെ വിദ്യാഭ്യാസ-തൊഴില്‍ മേഖലകളിലേതിനേക്കാള്‍ ആഴത്തില്‍ സ്വാധീനം ചെലുത്തിയത് ജനതയുടെ മാനസികമായ വികാസത്തിലും സംസ്കാരികമായ ഉന്നമനത്തിലുമാണ്. 1905-ല്‍ സെന്റ് തോമസ് കര്‍മ്മലീത്തസഭ സ്ഥാപിച്ച സെന്റ് ജോസഫ്സ് സ്കൂളും, സംസ്കൃത പ്രണയഭാജനം എന്നറിയപ്പെട്ടിരുന്ന പി.ടി.കുരിയാക്കോസ് മാസ്റ്റര്‍ 1909-ല്‍ സ്ഥാപിച്ച്, പില്‍കാലത്ത് സംസ്കൃതകോളേജായി മാറിയ സ്കൂളും 1936-ല്‍ കമ്മലീത്തസന്യാസിനികളുടെ ക്രൈസ്റ്റ് കിങ്ങ് കോണ്‍വെന്റ് പെണ്‍കുട്ടികള്‍ക്കായി സ്ഥാപിച്ച സ്കൂളും പാവറട്ടിയുടെ സാംസ്കാരിക-വിദ്യാഭ്യാസമേഖലകളെ വളര്‍ത്തുന്നതില്‍ വഹിച്ച പങ്ക് നിസ്തുലമാണ്. വെണ്മനാട് ജുമാ മസ്ജിദിന് ഏതാണ്ട് 650 വര്‍ഷത്തെ പഴക്കമുണ്ടെന്ന് കരുതപ്പെടുന്നു. ഇവിടുത്തെ ചന്ദ്രത്തില്‍ നേര്‍ച്ചയുല്‍സവം നാനാജാതിമതസ്ഥരും ചേര്‍ന്ന് കൊണ്ടാടുന്നു. മുല്ലശ്ശേരി ബ്ളോക്കിലെ ഇതരപഞ്ചായത്തുകളെ അപേക്ഷിച്ച് പാവറട്ടി, ക്രിസ്ത്യന്‍ മതവിശ്വാസികള്‍ കൂടുതലുള്ള ഒരു പഞ്ചായത്താണ്. ദേശീയപ്രസ്ഥാനകാലഘട്ടം മുതല്‍ നിരവധി സമുന്നതരായ നേതാക്കളുടെയും വ്യക്തികളും ഇവിടെ നിന്ന് ഉയര്‍ന്നുവന്നിട്ടുണ്ട്. പൊതുവെ ഉച്ചനീച്ചത്വങ്ങള്‍ക്ക് സ്ഥാനമില്ലാത്ത, ഏകോദര സഹോദര്യത്തോടെ ജീവിക്കുന്ന ഒരു ജനതയാണ് ഇവിടെയുള്ളത്. പൌരാണികത്വവും പ്രാമാണികത്വവും അവകാശപ്പെടാവുന്ന ക്രൈസ്തവദേവാലയങ്ങളാണ് പാവറട്ടി ഇടവകപ്പള്ളിയും ഗോവേന്തപ്പള്ളിയും. 1876-ലാണ് ആദ്യമായി പാവറട്ടിയില്‍ ഒരു പള്ളി സ്ഥാപിക്കപ്പെടുന്നത്. 1890-ല്‍ ഇന്നുള്ള ഗോവേന്തയുടെ ശിലാസ്ഥാപനം നടന്നു. പാവറട്ടി യൌസേപ്പിതാവിന്റെ ദേവാലയം അഖിലേന്ത്യാപ്രശസ്തമാണ്. ഈസ്റ്ററിനുശേഷം വരുന്ന മൂന്നാം ഞായറാഴ്ച നടക്കുന്ന പ്രശസ്തമായ പാവറട്ടി തിരുനാള്‍ മതസൌഹാര്‍ദ്ദത്തിന്റെ മകുടോദാഹരണമാണ്. ജാതിമതഭേദമന്യേ പാവറട്ടിയിലെ മുഴുവന്‍ ആളുകളും ഈ ഉത്സവത്തെ ഒരു ദേശീയഘോഷമാക്കി മാറ്റുന്നു. കേരളത്തിനു പുറത്തുനിന്നുപോലും ഭക്തര്‍ എത്തുന്ന ഉത്സവമാണിത്. 1958-ല്‍ ആദ്യമായി വൈദ്യുതിയെത്തി. ഇന്ന് ഗള്‍ഫുപണത്തിന്റെ കുത്തൊഴുക്കില്‍ വന്ന ഭീമാകാരങ്ങളായ ബംഗ്ളാവുകളും യഥാര്‍ത്ഥ്യബോധത്തിന്റെ ചെലവു കുറഞ്ഞ തരം വീടുകളും ഇടത്തരം വീടുകളും കുടിലുകളുമെല്ലാമുള്ള പാര്‍പ്പിടവൈവിധ്യം പാവറട്ടിയില്‍ എവിടെയും കാണാം. നിര്‍ദ്ധനര്‍ക്കും വീടില്ലാത്തവര്‍ക്കും വീടുണ്ടാക്കികൊടുക്കുന്ന കാര്യത്തില്‍ വേണ്ടത്ര പുരോഗതി നേടിയെന്ന് അവകാശപ്പെടാനാവില്ലെങ്കിലും ആ വഴിക്കുള്ള ചില ശ്രമങ്ങളും പാവറട്ടിയില്‍ നടന്നിട്ടുണ്ട്. മരുതയൂരിലെ കോളനിയും പൈങ്കണ്ണിയൂരിലെ കോളനിയും 9-ാം വാര്‍ഡിലെ കോളനിയും ആ വഴിയിലെ ചില കാല്‍വെപ്പുകള്‍ തന്നെ.

വിദ്യാഭ്യാസചരിത്രം

1890-ല്‍ സെന്റ് തോമസ് കര്‍മ്മലീത്താശ്രമസഭ സ്ഥാപിച്ച സെന്റ് ജോസഫ്സ് ഹൈസ്കൂളില്‍ 1905 മെയ് 18-ന് കെട്ടിടനിര്‍മ്മാണം ആരംഭിച്ചു. 1908 മെയ്-6 ന് മദ്രാസ് സര്‍ക്കാരിന്റെ അംഗീകാരം കിട്ടി. 1940-ല്‍ സെക്കന്ററി ട്രെയിനിംഗ് ക്ളാസുകളും 1943-ല്‍ ഹയര്‍ ട്രെയിനിങ്ങ് ക്ളാസുകളും ആരംഭിച്ചു. ഈ വിദ്യാലയത്തിന്റെ 100 വര്‍ഷത്തിന്റെ പ്രവര്‍ത്തനഫലങ്ങള്‍ പഞ്ചായത്തിന്റെ സാംസ്കാരിക-വിദ്യാഭ്യാസമേഖലയെ കാര്യമായി സ്വാധീനിച്ചിട്ടുണ്ട്. സമീപപഞ്ചായത്തുകളില്‍ നിന്നും ധാരാളം വിദ്യാര്‍ത്ഥികള്‍ ഈ സ്ഥാപനത്തെ ആശ്രയിച്ചിരുന്നു. നിരവധി പ്രഗല്‍ഭരായ വ്യക്തികളെ വളര്‍ത്തിയെടുത്തിട്ടുള്ള പ്രമുഖ വിദ്യാലയമാണിത്.1911-ല്‍ നിലത്തെഴുത്ത് വിദ്യാലയമായി ആരംഭിച്ച് 1934-ല്‍ ഒരു കോളേജായി ഉയര്‍ത്തപ്പെട്ട സംസ്കൃതകോളേജിന്റെ പേരില്‍ പാവറട്ടി ഇന്നും പ്രശസ്തമാണ്. ജീവിച്ചിരിപ്പുള്ളവരും മരിച്ചുപോയവരുമായി ഒട്ടുമിക്ക സംസ്കൃതപണ്ഡിതന്മാരും പ്രതിഭകളും ഈ വിദ്യാലയവുമായി ഏതെങ്കിലും രീതിയില്‍ ബന്ധമുള്ളവരാണ്. സംസ്കൃത പ്രണയഭാജനം എന്നറിയപ്പെടുന്ന പി.ടി.കുരിയാക്കോസ് മാസ്റ്ററാണ് ഈ സ്ഥാപനത്തിന്റെ വളര്‍ച്ചയ്ക്ക് അശ്രാന്തപരിശ്രമം നടത്തിയത്. പെണ്‍കുട്ടികളുടെ വിദ്യാഭ്യാസത്തിനായി 1936-ല്‍ ആരംഭിക്കപ്പെട്ട ക്രൈസ്റ്റ് കിങ്ങ് കോണ്‍വെന്റ് 1938-ല്‍ ഹൈസ്കൂളായി ഉയര്‍ത്തപ്പെട്ടു. ഈ സ്ഥാപനം ഇന്ന് 1800-ലേറെ വിദ്യാര്‍ത്ഥികള്‍ പഠിക്കുന്ന വലിയൊരു ഹൈസ്കൂളായി തുടരുന്നു. 1964-ല്‍ എം.കെ.മുഹമ്മദ് ഹാജി സ്ഥാപിച്ച പഞ്ചായത്തിലെ മൂന്നാമത്തെ ഹൈസ്കൂള്‍ ആയി മാറിയ എം.എ.എസ്.എം.യു.പി സ്കൂളും, മരുതയൂര്‍ സ്ഥാപിക്കപ്പെട്ട സര്‍ക്കാര്‍ യു.പി സ്കൂളൂം 11 എയിഡഡ് എല്‍.പി സ്കൂളുകളും 2 അണ്‍ എയിഡഡ് സ്കൂളുകളും നിരവധി പാരലല്‍ കോളേജുകളും ചേര്‍ന്ന പാവറട്ടിയുടെ വിദ്യാഭ്യാസമേഖല സമ്പന്നമാണ്. പാവറട്ടി വിദ്യാസമ്പന്നരുടെ ഒരു വലിയ നിരയെ തന്നെ സംഭാവന ചെയ്തിട്ടുണ്ട്. 1955 ഡിസംബറില്‍ അന്നത്തെ ഇന്ത്യന്‍ പ്രധാനമന്ത്രി ജവഹര്‍ ലാല്‍ നെഹ്റു സെന്റ് ജോസഫ്സ് ഹൈസ്കൂള്‍ സന്ദര്‍ശിച്ചിട്ടുണ്ട്. സെന്റ് ജോസഫ്സ് ഹൈസ്കൂളില്‍ 1940 മുതല്‍ 1959 വരെ തുടര്‍ന്നുവന്ന ട്രെയിനിംഗ് ക്ളാസ്സുകളും പി.ടി.കുര്യാക്കോസ് മാസ്റ്ററുടെ സ്കൂളിലെ ട്രെയിനിംഗ് കോഴ്സുകളും ക്രൈസ്റ്റ് കിങ്ങ് കോണ്‍വെന്റ് 1940-ല്‍ ആരംഭിച്ച ട്രെയിനിംങ്ങ് സ്കൂളും പാവറട്ടിയില്‍ മികച്ചൊരു അധ്യാപക സമൂഹത്തെ സൃഷ്ടിക്കുന്നതിന് വളരെയധികം സഹായിച്ചിട്ടുണ്ട്.